chāñdī jaisā rañg hai terā sone jaise baal
ik tū hī dhanvān hai gorī baaqī sab kañgāl
har āñgan meñ aa.e tere ujle ruup kī dhuup
chhail-chhabelī raanī thoḌā ghuñghaT aur nikāl
bhar bhar nazreñ dekheñ tujh ko āte-jāte log
dekh tujhe badnām na kar de ye hirnī sī chaal
kitnī sundar naar ho koī maiñ āvāz na duuñ
tujh sā jis kā naam nahīñ hai vo jī kā janjāl
sāmne tū aa.e to dhaḌkeñ mil kar lākhoñ dil
ab jaanā dhartī par kaise aate haiñ bhauñchāl
beach meñ rañg-mahal hai terā khaa.ī chāroñ or
ham se milne kī ab gorī tū hī raah nikāl
kar sakte haiñ chaah tirī ab 'sarmad' yā 'mansūr'
mile kisī ko daar yahāñ aur khiñche kisī kī khaal
ye duniyā hai ḳhud-ġharazoñ kī lekin yaar 'qatīl'
tū ne hamārā saath diyā to jiye hazāroñ saal