yaaro kahāñ tak aur mohabbat nibhā.ūñ maiñ
do mujh ko bad-duā ki use bhuul jā.ūñ maiñ
dil to jalā kiyā hai vo sho.ala sā aadmī
ab kis ko chhū ke haath bhī apnā jalā.ūñ maiñ
suntā huuñ ab kisī se vafā kar rahā hai vo
ai zindagī ḳhushī se kahīñ mar na jā.ūñ maiñ
ik shab bhī vasl kī na mirā saath de sakī
ahd-e-firāq aa ki tujhe āzmā.ūñ maiñ
badnām mere qatl se tanhā tū hī na ho
lā apnī mohr bhī sar-e-mahzar lagā.ūñ maiñ
utrā hai baam se koī ilhām kī tarah
jī chāhtā hai saarī zamīñ ko sajā.ūñ maiñ
us jaisā naam rakh ke agar aa.e maut bhī
hañs kar use 'qatīl' gale se lagā.ūñ maiñ