phir usī rahguzār par shāyad

ham kabhī mil sakeñ magar shāyad

jin ke ham muntazir rahe un ko

mil ga.e aur ham-safar shāyad

jān-pahchān se bhī kyā hogā

phir bhī ai dost ġhaur kar shāyad

ajnabiyyat kī dhund chhaT jaa.e

chamak uTThe tirī nazar shāyad

zindagī bhar lahū rulā.egī

yād-e-yārān-e-be-ḳhabar shāyad

jo bhī bichhḌe vo kab mile haiñ 'farāz'

phir bhī tū intizār kar shāyad