sab log liye sañg-e-malāmat nikal aa.e
kis shahr meñ ham ahl-e-mohabbat nikal aa.e
ab dil kī tamannā hai to ai kaash yahī ho
aañsū kī jagah aañkh se hasrat nikal aa.e
har ghar kā diyā gul na karo tum ki na jaane
kis baam se ḳhurshīd-e-qayāmat nikal aa.e
jo darpai-e-pindār haiñ un qatl-gahoñ se
jaañ de ke bhī samjho ki salāmat nikal aa.e
ai ham-nafaso kuchh to kaho ahd-e-sitam kī
ik harf se mumkin hai hikāyat nikal aa.e
yaaro mujhe maslūb karo tum ki mire baad
shāyad ki tumhārā qad-o-qāmat nikal aa.e