mustaqil mahrūmiyoñ par bhī to dil maanā nahīñ
laakh samjhāyā ki is mahfil meñ ab jaanā nahīñ
ḳhud-farebī hī sahī kyā kījiye dil kā ilaaj
tū nazar phere to ham samjheñ ki pahchānā nahīñ
ek duniyā muntazir hai aur terī bazm meñ
is tarah baiThe haiñ ham jaise kahīñ jaanā nahīñ
jī meñ jo aatī hai kar guzro kahīñ aisā na ho
kal pashemāñ hoñ ki kyuuñ dil kā kahā maanā nahīñ
zindagī par is se baḌh kar tanz kyā hogā 'farāz'
us kā ye kahnā ki tū shā.er hai dīvānā nahīñ