har be-zabāñ ko sho.ala-navā kah liyā karo
yaaro sukūt hī ko sadā kah liyā karo
ḳhud ko fareb do ki na ho talḳh zindagī
har sañg-dil ko jān-e-vafā kah liyā karo
gar chāhte ho ḳhush raheñ kuchh bandagān-e-ḳhās
jitne sanam haiñ un ko ḳhudā kah liyā karo
yaaro ye daur zo.af-e-basārat kā daur hai
āñdhī uThe to us ko ghaTā kah liyā karo
insān kā agar qad-o-qāmat na baḌh sake
tum is ko naqs-e-āb-o-havā kah liyā karo
apne liye ab ek hī rāh-e-najāt hai
har zulm ko razā-e-ḳhudā kah liyā karo
le de ke ab yahī hai nishān-e-ziyā 'qatīl'
jab dil jale to is ko diyā kah liyā karo