ġhurūr-e-jāñ ko mire yaar bech dete haiñ

qabā kī hirs meñ dastār bech dete haiñ

ye log kyā haiñ ki do-chār ḳhvāhishoñ ke liye

tamām umr kā pindār bech dete haiñ

junūn-e-zīnat-e-ārā.ish-e-makāñ ke liye

ka.ī makīñ dar-o-dīvār bech dete haiñ

zarā bhī nirḳh ho baalā to tājirān-e-haram

galīm o jubba o dastār bech dete haiñ

bas itnā farq hai yūsuf meñ aur mujh meñ 'farāz'

ki us ko ġhair mujhe yaar bech dete haiñ