jis se ye tabī.at baḌī mushkil se lagī thī

dekhā to vo tasvīr har ik dil se lagī thī

tanhā.ī meñ rote haiñ ki yuuñ dil ko sukūñ ho

ye choT kisī sāhab-e-mahfil se lagī thī

ai dil tire āshob ne phir hashr jagāyā

bedard abhī aañkh bhī mushkil se lagī thī

ḳhilqat kā ajab haal thā us kū-e-sitam meñ

saa.e kī tarah dāman-e-qātil se lagī thī

utrā bhī to kab dard kā chaḌhtā huā dariyā

jab kashtī-e-jāñ maut ke sāhil se lagī thī