dasht-e-vahshat ne phir pukārā hai
zindagī aaj tū gavārā hai
Dūbne se bachā ke māñjhī ne
dard ke ghaaT lā utārā hai
laakh tū mujh se hai magar mujh meñ
kab tirī ham-sarī kā yaarā hai
baat apnī anā kī hai varna
yuuñ to do haath par kinārā hai
dil kī gunjān rahguzāroñ meñ
karb-e-tanhā.ī kā sahārā hai
log marte haiñ band āñkhoñ se
ham ko is āgahī ne maarā hai
jān-e-'shahzād' zindagī kā safar
ham ne be-kārvāñ guzārā hai