tumheñ ab yaad aa.ī hai mirī kyā

Thikāne lag ga.ī āvārgī kyā

charāġhoñ ko bujhāte phir rahe ho

tumhārā mas.ala hai raushnī kyā

tumhī shāmil nahīñ jab zindagī meñ

bhalā ham kyā hamārī zindagī kyā

tumhārā tajraba kyā kah rahā hai

karoge phir kisī se dostī kyā

isī duniyā meñ tum ho aur maiñ bhī

to ab mumkin nahīñ hai vāpsī kyā

ḳhudā maane hue ho ek but ko

karoge ab usī kī bandagī kyā

nazar rakhte ho chūzoñ par hamesha

tumhārī bhī nazar hai chiil sī kyā

muqaddar so rahā hai jaane kab se

use ghere hue hai nīstī kyā

izāfa ho rahā hai dushmanoñ meñ

musībat ban rahī hai shā.irī kyā

fasīleñ toḌ kar niklī ho ghar se

tumheñ karnā hai 'raḳhshāñ' ḳhud-kushī kyā