diye jalā ke havāoñ ke muñh pe maar aayā
koī to hai jo añdheroñ kā qarz utaar aayā
ḳhudā se jab bhī kaḌī dhuup kī shikāyat kī
to merī raah meñ ek peḌ sāya-dār aayā
kahāñ huī kabhī us se hamārī dīd-o-shunīd
havā ke rath pe hamesha hī vo savār aayā
sukūn bāñTtī phirtī huuñ maiñ zamāne meñ
na jaane kyuuñ mire hisse meñ intishār aayā
hazār baar mirā dard muskurā.egā
hazār baar agar mausam-e-bahār aayā
sabab maiñ DhūñD rahī thī mirī udāsī kā
tirā ḳhayāl mujhe aaj baar baar aayā
kiyā hai us ne hī ġhārat mirā sukūn magar
usī ke naam pe 'raḳhshāñ' mujhe qarār aayā