uTho ye manzar-e-shab-tāb dekhne ke liye
ki niiñd shart nahīñ ḳhvāb dekhne ke liye
ajab harīf thā mere hī saath Duub gayā
mire safīne ko ġharqāb dekhne ke liye
vo marhala hai ki ab sail-e-ḳhūñ pe raazī haiñ
ham is zamīn ko shādāb dekhne ke liye
jo ho sake to zarā shah-savār lauT ke aa.eñ
piyād-gāñ ko zafar-yāb dekhne ke liye
kahāñ hai tū ki yahāñ jal rahe haiñ sadiyoñ se
charāġh diida o mehrāb dekhne ke liye