vo jo ik shart thī vahshat kī uThā dī ga.ī kyā
merī bastī kisī sahrā meñ basā dī ga.ī kyā
vahī lahja hai magar yaar tire lafzoñ meñ
pahle ik aag sī jaltī thī bujhā dī ga.ī kyā
jo baḌhī thī ki kahīñ mujh ko bahā kar le jaa.e
maiñ yahīñ huuñ to vahī mauj bahā dī ga.ī kyā
paañv meñ ḳhaak kī zanjīr bhalī lagne lagī
phir mirī qaid kī mī.ād baḌhā dī ga.ī kyā
der se pahuñche haiñ ham duur se aa.e hue log
shahr ḳhāmosh hai sab ḳhaak uḌā dī ga.ī kyā