mere hone meñ kisī taur se shāmil ho jaao

tum masīhā nahīñ hote ho to qātil ho jaao

dasht se duur bhī kyā rañg dikhātā hai junūñ

dekhnā hai to kisī shahr meñ dāḳhil ho jaao

jis pe hotā hī nahīñ ḳhūn-e-do-ālam sābit

baḌh ke ik din usī gardan meñ hamā.il ho jaao

vo sitamgar tumheñ tasḳhīr kiyā chāhtā hai

ḳhaak ban jaao aur us shaḳhs ko hāsil ho jaao

ishq kyā kār-e-havas bhī koī āsān nahīñ

ḳhair se pahle isī kaam ke qābil ho jaao

abhī paikar hī jalā hai to ye aalam hai miyāñ

aag ye ruuh meñ lag jaa.e to kāmil ho jaao

maiñ huuñ yā mauj-e-fanā aur yahāñ koī nahīñ

tum agar ho to zarā raah meñ haa.il ho jaao