ab to be-dād pe be-dād karegī duniyā
ham na hoñge to hameñ yaad karegī duniyā
zindagī bhaag chalī maut ke darvāze se
ab qafas kaun sā ījād karegī duniyā
ham to hāzir haiñ par ai silsila-e-jaur-e-qadīm
ḳhatm kab virsa-e-ajdād karegī duniyā
sāmne ā.eñge apnī hī vafā ke pahlū
jab kisī aur ko barbād karegī duniyā
kyā hue ham ki na the marg-e-bashar ke qaa.il
log pūchheñge to fariyād karegī duniyā