huī jo raat pahlū meñ ḳhushī se mar ga.e ham to

agar tere hī āñgan meñ sahar hotī to kyā hotā

guzar to yuuñ bhī jā.egī kaḌaktī dhuup meñ tanhā

tire dāman ke saa.e meñ basar hotī to kyā hotā

hazāroñ rāste vā the magar tujh tak jo pahuñchātī

kahīñ vo ek chhoTī sī Dagar hotī to kyā hotā

tirī is sard-mehrī meñ kasak sī bhī numāyāñ hai

ḳhudāyā ye navāzish bhī na gar hotī to kyā hotā

tirī sab dāstānoñ meñ mire qisse likhe hote

duā vo ek merī bā-asar hotī to kyā hotā

bahut hī pur-sukūñ nikle tire āġhosh se phir ham

ki ye āsūdgī āThoñ pahar hotī to kyā hotā