tamām-tar usī ḳhāna-ḳharāb jaisā hai
mire lahū kā nasha bhī sharāb jaisā hai
nahā rahā huuñ maiñ us ke badan kī kirnoñ meñ
vo aadmī hai magar māhtāb jaisā hai
karūñ talāsh javāhar to ret haath aa.e
samundaroñ kā chalan bhī sarāb jaisā hai
jalā gayā mujhe apne badan kī ThanDak se
vo jis kā rañg dahakte gulāb jaisā hai
'qatīl' kām-o-dahan apnā saath deñ ki na deñ
vafā kā zā.iqa lekin shabāb jaisā hai