kyā terā kyā merā ḳhvāb
jis kī qismat is kā ḳhvāb
baabā āñkheñ ne.amat haiñ
mat dekhā kar baabā ḳhvāb
saare saroñ par dastāreñ
ḳhvāb aur dīvāne kā ḳhvāb
maiñ ne ujrat māñgī thī
us ne haath pe rakkhā ḳhvāb
baañT aate haiñ bachchoñ meñ
roz ik jhūTā sachchā ḳhvāb
shab bhar aañkh meñ bhīgā thā
puure din meñ sūkhā ḳhvāb
ik saf meñ mahmūd aur maiñ
ye auqāt aur aisā ḳhvāb
ham us shahr ke log jahāñ
taaza havā kā jhoñkā ḳhvāb
aksar pakḌe jaate haiñ
pahlā jurm aur pahlā ḳhvāb