mujh se rūThā hai kyā kiyā jaa.e
vo bhī apnā hai kyā kiyā jaa.e
ho khilaunā to dūsrā le luuñ
dil jo TuuTā hai kyā kiyā jaa.e
dil ke nashtar chhupā to luuñ lekin
surḳh āñkhoñ kā kyā kiyā jaa.e
us kī mahfil ko chhoḌ aa.ī huuñ
ab vo tanhā hai kyā kiyā jaa.e
us kī hālat pe dil laraztā hai
ġham meñ hañstā hai kyā kiyā jaa.e
baat ḳhanjar kī tarah chubhtī hai
dil kā achchhā hai kyā kiyā jaa.e
mujh ko dil se nikāl kar apne
vo taḌaptā hai kyā kiyā jaa.e