ek pal meñ dam-e-guftār se lab-e-tar ho jaa.e
tujh se jo baat bhī kar le vo suḳhan-var ho jaa.e
ab yahāñ sirf parī-chehra raheñge aa kar
aur koī in ke alāva hai to bāhar ho jaa.e
ho gayā rishta-e-jāñ phir dil-e-nādān ke saath
is sipāhī kī tamannā hai ki lashkar ho jaa.e
ab ke Thahrā.ī hai ham ne bhī yahī shart-e-vafā
jo bhī is shahr meñ aa.e vo sitam-gar ho jaa.e
yaanī ai dīda-e-tar terī ināyat hai ki bas
varna maidān-e-suḳhan aaj hī banjar ho jaa.e
ham ne āshob ke aalam meñ kahī hai ye ġhazal
so ye ḳhvāhish hai ki har sher gul-e-tar ho jaa.e