hausla itnā abhī yaar nahīñ kar paa.e
ḳhud ko rusvā sar-e-bāzār nahīñ kar paa.e
dil meñ karte rahe duniyā ke safar kā sāmāñ
ghar kī dahlīz magar paar nahīñ kar paa.e
ham kisī aur ke hone kī nafī kyā karte
apne hone pe jab isrār nahīñ kar paa.e
sā.at-e-vasl to qaabū meñ nahīñ thī lekin
hijr kī shab kā bhī dīdār nahīñ kar paa.e
ye to ārā.ish-e-mahfil ke liye thā varna
ilm o dānish kā ham iz.hār nahīñ kar paa.e