tire abrū pe bal aayā to hotā
zarā ġhairoñ ko dhamkāyā to hotā
bajā.e farsh maiñ āñkheñ bichhātā
tū apne va.ade par aayā to hotā
samajhte farsh par ham chādar-e-gul
tirā ai rashk-e-gul saayā to hotā
shikāyat aa.egī ai jazb-e-ulfat
janāze par use laayā to hotā
kiyā thā gar falak tū ne siyah-baḳht
to maiñ us maah kā saayā to hotā
na hotā dard-e-sar phir tum ko 'ājiz'
sar us ke dar pe Takrāyā to hotā