jab se junūn-e-shauq ke mehvar badal ga.e
chehroñ ke phuul qad ke sanobar badal ga.e
kyuuñ apne saath dīda-e-hairāñ ko le gayā
bachpan gayā to husn ke paikar badal ga.e
zahrāb-e-ishq pī na sake bul-havas kabhī
kahne kī baat hai ḳhum-o-sāgar badal ga.e
soyā to aañkh meñ tire sapne samā ga.e
jaagā to rañg ḳhvāb ke yaksar badal ga.e
ai umr-e-rafta luuT ke aa jā bas ek baar
aa jā ki sub.h-o-shām ke tevar badal ga.e