ye dil-kathā hai adākār tere bas meñ nahīñ
maiñ ḳhuun thūktā kirdār tere bas meñ nahīñ
maiñ māntā huuñ ki tujh ko bhulā nahīñ saktā
mujhe bhulānā bhī ai yaar tere bas meñ nahīñ
hai roz bārgah-e-dil meñ aag par mātam
ye ġham manānā azā-dār tere bas meñ nahīñ
mire ḳhudā ho mujhe bhī bashārat-e-baḳhshish
nahīñ ki mujh sā gunāhgār tere bas meñ nahīñ
mirī nazar meñ haiñ uslūb-e-naqd-o-fikr-o-suḳhan
mire vajūd kā inkār tere bas meñ nahīñ