galī kā patthar thā mujh meñ aayā bigāḌ aisā

maiñ Thokareñ khā ke ho gayā huuñ pahāḌ aisā

ḳhudā ḳhabar dil meñ koī aaseb hai ki is meñ

koī na aayā gayā paḌā hai ujaaḌ aisā

na sar uThā paa.e koī bhauñchāl mujh meñ ai vaqt

maiñ narm miTTī huuñ so mujhe tū latāḌ aisā

chahār jānib paḌe haiñ purze nigāh-o-dil ke

hamārā is ishq ne kiyā hai kabāḌ aisā

maiñ bhuul baiThā huuñ hañsnā 'fartāsh' bhuul baiThā

huā hai ḳhushiyoñ kā band mujh par kivāḌ aisā