husn faanī hai javānī ke fasāne tak hai
par ye kam-baḳht mohabbat to zamāne tak hai
vo milegā to shanāsā.ī diloñ tak hogī
ajnabiyyat to faqat sāmne aane tak hai
dasht meñ paañv dharā thā kabhī vahshat ke baġhair
ab vahī ret mire ā.īna-ḳhāne tak hai
shā.erī pīroñ faqīroñ kā vazīfa thā kabhī
ab to ye kaam faqat naam kamāne tak hai
chāñd gardūñ ko mayassar hai sahar hone tak
raqs-e-darvesh tire baam pe aane tak hai
maiñ mohammad ke ġhulāmoñ kā ġhulām ibn-e-ġhulām
aise nisbat usī pākīza gharāne tak hai