muḳhtasar sī zindagī meñ kitnī nādānī kare

in nazāroñ ko koī dekhe ki hairānī kare

dhuup meñ in ābgīnoñ ko liye phirtā huuñ maiñ

koī saaya mere ḳhvāboñ kī nigahbānī kare

ek maiñ huuñ aur dastak kitne darvāzoñ pe duuñ

kitnī dahlīzoñ pe sajda ek peshānī kare

raat aisī chāhiye māñge jo din bhar kā hisāb

ḳhvāb aisā ho jo in āñkhoñ meñ vīrānī kare

sāhiloñ par maiñ khaḌā huuñ tishna-kāmoñ kī tarah

koī mauj-e-āb merī aañkh ko paanī kare