yuuñ hī sar chaḌh ke har ik mauj-e-balā bolegī
ham jo ḳhāmosh raheñge to havā bolegī
boltā rahtā hai jo aaj sar-e-shāḳh-e-anā
chup sī lag jā.egī jis roz fanā bolegī
tujh se ummīd kise hai mirī lailā-e-hayāt
mahmil-e-nāz se kyā chashm-e-atā bolegī
vo to rahtā hai yūñhī apne gulistān meñ gum
lab-e-ḳhāmosh se kyā barg-e-hinā bolegī
mausam-e-nāra-e-bulbul bhī kabhī aa.egā
is se māyūs na ho ḳhalq-e-ḳhudā bolegī