hijr kī manzil hameñ ab ke pasand aa.ī nahīñ

ham akele haiñ magar hamrāh tanhā.ī nahīñ

ek din chhin jā.egā āñkhoñ se saarā rañg-o-nūr

dekh lo un ko ki ye manzar hameshā.ī nahīñ

ik junūñ ke vāste bastī ko vus.at dī ga.ī

ek vahshat ke liye sahrā meñ pahnā.ī nahīñ

kaun se manzar kī tābānī añdherā kar ga.ī

aisā kyā dekhā ki ab āñkhoñ meñ bīnā.ī nahīñ

jab kabhī fursat milegī dekh leñge saare ḳhvāb

ḳhvāb bhī apne haiñ ye rāteñ bhī harjā.ī nahīñ