mayassar ho jo lamha dekhne ko
kitāboñ meñ hai kyā kyā dekhne ko
hazāroñ qadd-e-ādam aa.ine haiñ
magar tarsoge chehra dekhne ko
abhī haiñ kuchh purānī yādgāreñ
tum aanā shahr merā dekhne ko
phir us ke baad thā ḳhāmosh paanī
ki log aa.e the dariyā dekhne ko
havā se hī khultā thā aksar
mujhe bhī ik darīcha dekhne ko
qayāmat kā hai sannāTā fazā meñ
nahīñ koī parinda dekhne ko
abhī kuchh phuul haiñ shāḳhoñ pe 'az.har'
mujhe kāñToñ meñ uljhā dekhne ko