detī nahīñ amaañ jo zamīñ āsmāñ to hai
kahne ko apne dil se koī dāstāñ to hai
yuuñ to hai rañg zard magar hoñT laal haiñ
sahrā kī vus.atoñ meñ kahīñ gulsitāñ to hai
ik chiil ek mumTī pe baiThī hai dhuup meñ
galiyāñ ujaḌ ga.ī haiñ magar pāsbāñ to hai
āvāz de ke dekh lo shāyad vo mil hī jaa.e
varna ye umr bhar kā safar rā.egāñ to hai
mujh se bahut qarīb hai tū phir bhī ai 'munīr'
parda sā koī mere tire darmiyāñ to hai