aa.ina ab judā nahīñ kartā
qaid meñ huuñ rihā nahīñ kartā
mustaqil sabr meñ hai koh-e-girāñ
naqsh-e-ibrat sadā nahīñ kartā
rañg-e-mahfil badaltā rahtā hai
rañg koī vafā nahīñ kartā
aish-e-duniyā kī justujū mat kar
ye dafīna milā nahīñ kartā
jī meñ aa.e jo kar guzartā hai
tū kisī kā kahā nahīñ kartā
ek vāris hamesha hotā hai
taḳht ḳhālī rahā nahīñ kartā
ahd-e-insāf aa rahā hai 'munīr'
zulm daa.em huā nahīñ kartā