thakan se raah meñ chalnā muhāl bhī hai mujhe
kamāl par bhī thā maiñ hī zavāl bhī hai mujhe
saḌak pe chalte hue ruk ke dekhtā huuñ maiñ
yahīñ kahīñ hai tū ye ehtimāl bhī hai mujhe
ye mere gird tamāshā hai aañkh khulne tak
maiñ ḳhvāb meñ to huuñ lekin ḳhayāl bhī hai mujhe
usī ke lutf se marne se ḳhauf aatā hai
usī ke Dar se ye jiinā muhāl bhī hai mujhe
savād-e-shām-e-safar hai jalā jalā sā 'munīr'
ḳhushī ke saath ajab sā malāl bhī hai mujhe