Muneer Niyazi

sun bastiyon ka haal jo had se guzar gain

Muneer Niyazi

Hoshiarpur, Punjab, India

1923-2006
sun bastiyoñ kā haal jo had se guzar ga.iiñ
un ummatoñ kā zikr jo rastoñ meñ mar ga.iiñ
kar yaad un dinoñ ko ki ābād thiiñ yahāñ
galiyāñ jo ḳhaak o ḳhuun kī dahshat se bhar ga.iiñ
sarsar kī zad meñ aa.e hue bām-o-dar ko dekh
kaisī havā.eñ kaisā nagar sard kar ga.iiñ
kyā baab the yahāñ jo sadā se nahīñ khule
kaisī duā.eñ thiiñ jo yahāñ be-asar ga.iiñ
tanhā ujaaḌ burjoñ meñ phirtā hai tū 'munīr'
vo zar-fishāniyāñ tire ruḳh kī kidhar ga.iiñ
Top Urdushayar.com