shab-e-māhtāb ne shah-nashīñ pe ajiib gul sā khilā diyā

mujhe yuuñ lagā kisī haath ne mire dil pe tiir chalā diyā

koī aisī baat zarūr thī shab-e-va.ada vo jo na aa sakā

koī apnā vahm thā darmiyāñ yā ghaTā ne us ko Darā diyā

yahī aan thī mirī zindagī lagī aag dil meñ to uf na kī

jo jahāñ meñ koī na kar sakā vo kamāl kar ke dekhā diyā

ye jo laal rañg patañg kā sar-e-āsmāñ hai uḌā huā

ye charāġh dast-e-hinā kā hai jo havā meñ us ne jalā diyā

mire paas aisā tilism hai jo ka.ī zamānoñ kā ism hai

use jab bhī sochā bulā liyā use jo bhī chāhā banā diyā