sīrat achchhī hai tirī yaar jamāl achchhā hai
tū bahar-taur bas ai nek-ḳhisāl achchhā hai
be-qarārī hai vo aglī sī na vo dard-e-jigar
ab to kuchh kuchh tire bīmār kā haal achchhā hai
kab tire ḳhāl-e-munavvar se haiñ taare achchhe
kab tire abrū-e-pur-ḳham se hilāl achchhā hai
dekh kar aa.ine meñ qāmat-e-abrū se kahā
gulshan-e-dahr meñ ik ye hī nihāl achchhā hai
ek bosa pe jo dil detā hai 'sābir' le lo
mol kam hai magar ai jaan ye maal achchhā hai