terī tasvīr ko taskīn-e-jigar samjhe haiñ

tere dīdār ko ham zauq-e-nazar samjhe haiñ

qahr kī āñkhoñ se tum ne hameñ jab bhī dekhā

ham ise ain mohabbat kī nazar samjhe haiñ

hai yahī un kā samajhnā to ḳhudā hāfiz hai

tālib-e-ḳhair ko vo bāni-e-shar samjhe haiñ

un kī mānind koī sāhab-e-idrāk kahāñ

jo farishte nahīñ samjhe vo bashar samjhe haiñ

apnī āñkhoñ meñ jagah dete haiñ mujh ko 'sābir'

mere ahbāb mujhe kohl-e-basar samjhe haiñ