jab se maiñ ne ishq kā pairāhan pahnā hai
sūraj mujh se aañkh churātā phirtā hai
is kī bāteñ mujh se to ab pūchho nā
haal us kā bhī bilkul mere jaisā hai
kaise us ko dil kī hālat samjhā.ūñ
baat karūñ to aañkh churāne lagtā hai
kuchh na kahnā us kī bhī majbūrī hai
sharm-o-hayā kā dāman us ne thāmā hai
dekh use sab zikr hamārā karte haiñ
us kī aañkh meñ sirf hamārā chehra hai
rāz-e-mohabbat kaise bhalā us ko likkhūñ
ḳhat merā vo dostoñ meñ bhī paḌhtā hai