hai bhī aur phir nazar nahīñ aatī
dhyān meñ vo kamar nahīñ aatī
māñgtā huuñ magar nahīñ aatī
ye ajal vaqt par nahīñ aatī
tere kushtoñ kā roz-e-hashr hisāb
ġhairat o fitna-gar nahīñ aatī
tab.a apnī bhī ek āñdhī hai
ḳhaak uḌānī magar nahīñ aatī
abr kis kis tarah barastā hai
sharm ai chashm-e-tar nahīñ aatī
tum to yuuñ mahv-e-zulm ho ki hamīñ
aah karnī magar nahīñ aatī
nazr kuchh kar ke dil ko le ki ye jins
muft ai muft-bar nahīñ aatī
muḳhtasar hāl-e-dard-e-dil ye hai
maut ai chāragar nahīñ aatī
yārab ābād kū-e-yār rahe
ki qayāmat idhar nahīñ aatī
niiñd kā kaam garche aanā hai
merī āñkhoñ meñ par nahīñ aatī
be-tarah paḌtī hai nazar un kī
ḳhair dil kī nazar nahīñ aatī
be-parī ne uḌā rakhā hai mujhe
hasrat-e-bāl-o-par nahīñ aatī
sab kuchh aatā hai tū nahīñ aatā
gar vafā sīm-bar nahīñ aatī
apnī is aarzū ko kyā kosūñ
aab vahāñ teġh par nahīñ aatī
jaan denī to ham ko aatī hai
dil ko taskīn agar nahīñ aatī
ġhair kuchh māñgtā hai dekheñ to
hai tumheñ kis qadar nahīñ aatī
dil kī apne jigar pe luuñ lekin
ek kī ek par nahīñ aatī
dushman aur ik nigah meñ lauT na jaa.e
choT puurī magar nahīñ aatī
terā kūcha hai misr-e-nazāra
ki palaT kar nazar nahīñ aatī
un kā aanā to ek aanā hai
maut bhī vaqt par nahīñ aatī
'anvar' is shab kī dekh lo tāḳhīr
sub.h hotī nazar nahīñ aatī