kahīñ ḳhulūs kī ḳhushbū mile to ruk jā.ūñ

mire liye koī aañsū khile to ruk jā.ūñ

maiñ us ke saa.e meñ yuuñ to Thahar nahīñ saktā

udaas peḌ kā pattā hile to ruk jā.ūñ

kabhī palak pe sitāre kabhī laboñ pe gulāb

agar na ḳhatm hoñ ye silsile to ruk jā.ūñ

vo ek rabt jo itnā baḌhā ki TuuT gayā

simaT ke joḌ de ye fāsle to ruk jā.ūñ

bahut tavīl añdheroñ kā hai safar 'tāhir'

kahīñ jo dhuup kā saaya mile to ruk jā.ūñ