kis kā hai jurm kis kī ḳhatā sochnā paḌā
rahte haiñ kyuuñ vo ham se ḳhafā sochnā paḌā
gul kī hañsī meñ raqs-e-nujūm-o-qamar meñ bhī
shāmil hai kitnī terī adā sochnā paḌā
jab bhī mirī vafāoñ kī baat aa ga.ī kahīñ
un ko phir ek uzr-e-jafā sochnā paḌā
ġhunche udaas gul haiñ fasurda chaman chaman
kis kā karam hai bād-e-sabā sochnā paḌā
shāyad tumhārī yaad mire paas aa ga.ī
yā hai mire hī dil kī sadā sochnā paḌā
jab bhī koī bhaTak ke sar-e-rāh aa gayā
kitnī kaThin hai rāh-e-vafā sochnā paḌā
zindāñ kī baat daar ke charche rasan kā zikr
kitnī ajab hai tab-e-rasā sochnā paḌā