nahīñ samjhī thī jo samjhā rahī huuñ
ab uljhī huuñ to khultī jā rahī huuñ
bahut gahrī hai us kī ḳhāmushī bhī
maiñ apne qad ko chhoTā pā rahī huuñ
umañD aayā hai shor auroñ ke ghar se
darīche khol ke pachhtā rahī huuñ
hujūm itnā ki chehre bhuul jā.ūñ
bisāt-e-zāt ko phailā rahī huuñ
ye manzar pūchhte haiñ mujh se aksar
kahāñ se aa.ī huuñ kyuuñ jā rahī huuñ
agar sach hai to phir sābit karo tum
maiñ apne aap ko jhuTlā rahī huuñ