bikhar rahe the har ik samt kā.enāt ke rañg
magar ye aañkh ki jo DhūñDtī thī zaat ke rañg
hamāre shahr meñ kuchh log aise rahte haiñ
safar kī samt batāte haiñ jin ko raat ke rañg
ulajh ke rah ga.e chehre mirī nigāhoñ meñ
kuchh itnī tezī se badle the un kī baat ke rañg
bas ek baar unheñ khelne kā mauqā do
ḳhud in kī chaal batā degī saare maat ke rañg
havā chalegī to ḳhushbū mirī bhī phailegī
maiñ chhoḌ aa.ī huuñ peḌoñ pe apnī baat ke rañg