mire haal par mehrbānī kare
ḳhudā se kaho hukm-e-sānī kare
maiñ ik buuñd paanī baḌī chiiz huuñ
samundar mirī pāsbānī kare
paḌheñ log tahrīr-e-dīvār o dar
ḳhulāsa mirī be-zabānī kare
azal se maiñ us ke ta.āqub meñ huuñ
jo lamha mujhe ġhair-fānī kare
vo baḳhshe ujāle kisī sub.h ko
koī shaam raushan suhānī kare
mire saa.e meñ sab haiñ mere sivā
koī to mirī sā.ebānī kare
koī hai jo baḌh ke uThā le 'amīr'
vo tesha jo patthar ko paanī kare