mohabbat tark kī maiñ ne garebāñ sī liyā maiñ ne
zamāne ab to ḳhush ho zahr ye bhī pī liyā maiñ ne
abhī zinda huuñ lekin sochtā rahtā huuñ ḳhalvat meñ
ki ab tak kis tamannā ke sahāre jī liyā maiñ ne
unheñ apnā nahīñ saktā magar itnā bhī kyā kam hai
ki kuchh muddat hasīñ ḳhvāboñ meñ kho kar jī liyā maiñ ne
bas ab to dāman-e-dil chhoḌ do bekār ummīdo
bahut dukh sah liye maiñ ne bahut din jī liyā maiñ ne