ahl-e-dil aur bhī haiñ ahl-e-vafā aur bhī haiñ

ek ham hī nahīñ duniyā se ḳhafā aur bhī haiñ

ham pe hī ḳhatm nahīñ maslak-e-shorīda-sarī

chāk-e-dil aur bhī haiñ chāk-e-qabā aur bhī haiñ

kyā huā gar mire yāroñ kī zabāneñ chup haiñ

mere shāhid mire yāroñ ke sivā aur bhī haiñ

sar salāmat hai to kyā sañg-e-malāmat kī kamī

jaan baaqī hai to paikān-e-qazā aur bhī haiñ

munsif-e-shahr kī vahdat pe na harf aa jaa.e

log kahte haiñ ki arbab-e-jafā aur bhī haiñ