kahīñ fasāna-e-ġham hai kahīñ ḳhushī kī pukār
sunegā aaj yahāñ kaun zindagī kī pukār
ḳhudā shanās hai zāhid magar nahīñ ma.alūm
ki aadmī ko jagātī hai aadmī kī pukār
libās-e-sub.h meñ hai koī rahbar-e-sādiq
jagā rahī hai añdhere ko raushnī kī pukār
fuġhān-e-rūh-e-mohabbat thī yā sadā-e-habīb
sunī to hai dil-e-ḳhāmosh ne kisī kī pukār
tirā sukūt na rusvā kare 'ravish' tujh ko
ki duur duur pahuñchtī hai ḳhāmushī kī pukār