chamakte chāñd sitāro zarā ḳhayāl karo

kabhī to dil se pukāro zarā ḳhayāl karo

hayā ke dhāgoñ meñ lipTe hue haiñ ham donoñ

na.ī rutoñ ke ishāro zarā ḳhayāl karo

girī to TuuT ke bikhrūñgī duur duur kahīñ

ai kāġhzī se sahāro zarā ḳhayāl karo

sulag rahā hai kisī kā firāq tan-man meñ

idhar na aao bahāro zarā ḳhayāl karo

milan kī aas hai lekin ye kaam nā-mumkin

nadī ke donoñ kināro zarā ḳhayāl karo

'samīna' ashk girā do ye zabt chhoḌo bhī

inheñ na dil se guzāro zarā ḳhayāl karo