mohabbat aur ḳhushbū kā nagar taqsīm ho jaa.e

kahīñ aisā na ho ghar kā shajar taqsīm ho jaa.e

lahū rotī huī āñkheñ lahū rotī hī rahtī haiñ

havas ke haath jab purkhoñ kā ghar taqsīm ho jaa.e

kabhī bhī aag kī fasleñ yahāñ par ug nahīñ saktīñ

mohabbat saare aalam meñ agar taqsīm ho jaa.e

udāsī ke ghane jañgal meñ raste jā nikalte haiñ

fazāoñ meñ nayā jab ek Dar taqsīm ho jaa.e

kabhī jo yaad kartī huuñ tirī qurbat ke lamhoñ ko

mirī sāñsoñ talak us kā asar taqsīm ho jaa.e

mirī maañ kī duāoñ kā 'samīna' mo.ajiza dekho

mire pairoñ meñ aate hī bhañvar taqsīm ho jaa.e