bhītar basne vaalā ḳhud bāhar kī sair kare maulā ḳhair kare

ik mūrat ko chāhe phir ka.abe ko dair kare maulā ḳhair kare

ishq-vishiq ye chāhat-vāhat man kā bhulāvā phir man bhī apnā kyā

yaar ye kaisā rishta jo apnoñ ko ġhair kare maulā ḳhair kare

ret kā tuudā āñdhī kī faujoñ par tiir chalā.e Tahnī peḌ chabā.e

chhoTī machhlī dariyā meñ ghaḌiyāl se bair kare maulā ḳhair kare

soch ki kāfir har mūrat pe jaan chhiḌaktā hai bin paañv thiraktā hai

man kā musalmāñ ab qible kī jānib pair kare maulā ḳhair kare

fikr kī chaak pe maaTī kī tū shakl badaltā hai yā ḳhud hī Dhaltā hai

'bekal' be-par lafzoñ kī taḳh.īl ko tair kare maulā ḳhair kare